![](https://top-channel.tv/wp-content/uploads/2024/06/be_sd-1-800x450.jpg)
Kryeprokurori i gjykatës së Hagës, Serge Brammertz ka përshëndetur arrestimin e ish-komandantit të serbëve të Bosnjes, Ratko Mlladic.
Brammertz ka vlerësuar se, në këtë mënyrë Serbia ka përmbushur detyrimet e saj përballë drejtësisë.
“Tani ne presim marrëveshjen për transferimin e Mlladic në Hagë, ku ai do të gjykohet. Falenderojmë autoritetet serbe për përmbushjen e detyrimeve të tyre ndaj gjykatës dhe drejtësisë”, ka deklaruar Brammertz.
Më herët, prokurori serb për krimet e luftës, Bruno Vekaric deklaroi se për të vendosur mbi ekstradimin e gjeneralit do të duhet të paktën një javë.
Sipas Vekaric, Mlladic do të merret fillimisht në pyetje nga një prokuror serb, i cili do t’i ngrejë akuzat dhe do vendosë nëse ka kushte për ekstradim.
Mlladic u arrestua paraditen e sotme në fshatin Lazarevo, rreth 80 kilometra në veri-lindje të Beogradit, pas 16 vjetësh arrati. Ai akuzohet nga gjykata e Hagës për krime lufte, krime kundër njerëzimit dhe genocid.
Top Channel