Banorët e fshatit Xibrakë, të rrethit të Cërrikut prej disa muajsh vuajnë mungesën e ujit të pijshëm.
Shkak për këtë është bërë çarja e rrjetit ujësjellës në disa pika.
Por edhe në ato pak minuta që ata furnizohen me ujë, ai është i pakonsumueshëm pasi vjen i trubullt, duke rrezikuar kështu serozisht shëndetin e mbi 2 mijë banorëve.
Kamera e Top Channel e ndoqi nga afër problemin dhe atje gjetën punonjësit e ndërmarrjes së ujësjellësit duke punuar, por menjëherë sapo panë praninë e mediave, punimet i lanë pa përfunduar, duke ndërprerë për 24 orë edhe furnizimin me ujë të fshatit.
“Populli ka shumë kohë pa ujë dhe kërkesën e kemi bërë prej kohësh se nuk është punuar tamam”, shprehet një prej banorëve.
“Problemi qendron tek ndërmarrja e ujësjellësit që merr lekët dhe nuk sjell ujë”, shton një tjetër banor.
Në shenjë proteste këto familje nuk kanë paguar edhe faturat e ujit për këtë muaj, duke kërkuar me ngulm zgjidhjen e problemit.
Për të plotësuar nevojat për ujë të pijshëm, banorët janë të detyruar që t’a blejnë ujin dhe për të kryer nevoja të tjera, e mbushin ujin në disa puse apo përrenjtë afër fshatit.
Top Channel
