Për shkak të reshjeve pati rrëshqitje të dheut edhe në linjën hekurudhore Librazhd-Pogradec, në fshatin Dragostunje.
Masive dheu dhe balte, shkaktuan bllokimin të linjës hekurudhore, e për pasojë edhe anomali në itinerarin e lëvizjes së trenit në linjën Tiranë-Pogradec.
Zona u pastrua më pas nga punonjësit e Drejtorisë së Rrugëve Nacionale, duke dërguar në vend mjetet e rënda.
Reshjet shkaktuan përmbytje edhe ne Elbasan. Situata është rënduar nga mungesa e kanalizimeve në një prej lagjeve dhe prurjeve të shumta të shiut.
Por problemi më shqetësues mbetet dalja e ujërave të zeza në sipërfaqe të cilat futen në oborret e shtëpive. Kjo situatë krijohet sa herë që bie shi dhe banorët detyrohen që ta nxjerrin ujin që futet në oborret e shtëpive me kova.
Ata kanë kërkuar nga autoritetet shumë herë bërjen e kanalizimeve, por kjo mbetet thjesht një shpresë e largët për t’u realizuar.
Përveç kësaj kjo lagje vazhdon të rrezikohet edhe nga Përroi i Zaranikës, argjinatura e të cilit është në gjendje kritike.
Top Channel
