Policia në Rio de Zhaneiro ka marrë nën kontroll të plotë lagjen problematike Vila Kruzeiron, e njohur ndryshe si “qyteza e barrakave”.
Lajmin e bëjnë të ditur autoritetet lokale, sipas të cilave operacioni i forcave të sigurisë për të frenuar dhunën e bandave të drogës po vazhdon.
Forcat e sigurisë hynë me autoblinda, të cilat transportonin policë të armatosur, në Vila Kruzeiro, që ndodhet në veri të qytetit.
Ofensiva vjen pas 5 ditësh përleshje mes narkotrafikantëve dhe forcave të rendit, të cilat kanë shkaktuar vdekjen e të paktën 30 personave.
Për t’iu kundërpërgjigjur policisë, trafikantët kishin ngritur barrikada, kishin djegur automjete dhe qëlluar me armë zjarri.
Autoritetet braziliane kanë deklaruar se lordët e narkotrafikut janë strehuar në Vila Kruzeiro pasi ishin përzënë nga lagje të tjera analoge.
Top Channel
