Irlandë, “Ok zgjedhjeve të parakohshme”

Kryeministri Cowen ka dalë përpara gazetarëve duke deklaruar se ai nuk e ka ndërmend largimin e menjëhershëm pa mbaruar reformat financiare për të zvogluar defiçitin buxhetor dhe nisjen e menaxhimit të paketës shpëtimtare prej 90 miliardë euro akorduar nga Bashkimi Europian.

Megjithatë kryeministri irlandez  ka thënë se ai do ta shpërndajë parlamentin fillimvitin e ardhshëm duke i hapur rrugë zgjedhjeve të përgithëshme.

Deklarata e Brian Cowen erdhi vetëm disa orë pasi lideri Partisë së Gjelbër, John Gormley, pjesë e koalicionit qeverisës,  tha se qeveria duhet të hartojë një plan emergjence katër vjeçar, kalimin muajin e ardhshëm të  buxhetit për vitin 2011 dhe më pas të shpërndajë parlamentin.

Duke shpjeguar këtë vendim John Gormley tha: “Zhvillimet e javës së fundit ishin tronditse për elektoratin irlandez. Njerëzit  janë  të tradhëtuar dhe të drejtuar keq”.

Partia e Gjelbër në parlamentin irlandez ka gjashtë deputetë votat e të cilëve janë të domosdoshme për të kaluar ligjet e propozuara nga qeveria e kryeministrit Brian Cowen.

Për të mos krijuar një çarje të koalicionit Cowen ka pranuar një largim të butë duke e çuar Irlandë drejt zgjedhjeve.

Top Channel