Irlanda krahas krizës ekonomike, duket se është në prag të një krize politike pasi Partia e Gjelbër pjesë koalicionit qeverisës ka kërcënuar me largimin nga koalicioni nëse nuk zhvillohen zgjedhje të parakohshme fillimvitin e ardhshëm.
Lideri partisë së gjelbër John Gormley tha se qeveria duhet të hartojë një plan emergjence katër vjecar, kalimin muajin e ardhshëm të buxhetit për vitin 2011 dhe më pas të shpërndajë parlamentin.
Duke shpjeguar këtë vendim John Gormley tha: “Zhvillimet e javës së fundit ishin tronditëse për elektoratin irlandez. Njerëzit ndjehen të tradhëtuar dhe të drejtuar keq”.
Të gjelbërit irlandez besojnë se zgjedhjet e parakohshme do t’i japin mundësi irlandezëve të lëkundur të zgjedhin një qeveri të votëbesuar nga shumica e tyre.
Partia e gjelbër në parlamentin irlandez ka gjashtë deputetë votat e të cilëve janë të domosdoshme për të kaluar ligjet e propozuara nga qeveria e kryeministrit Brian Coëen.
Propozimi për zgjedhje të parakohshme që vjen nga një parti e koalicionit qeverisës është përshkruar nga analistët politik si një trondintje e papritur për qeverinë irlandeze në këto momente tejet të vështira.
Kërkesa e Partisë se Gjelbër vjen menjeherë pasi Bashkimi Europian i garantoi Irlandës një ndihmë prej miliarda euro që do të lëvrohen gjatë tre viteve të ardhshme.
Drejtuesit e Fondit Monetar Ndërkombëtar ende nuk e kanë bërë publike shifrën e ndihmës që pritet të jetë më shume se 80 miliardë euro.
Megjithëse Anglia nuk është pjesë e Eurozonës, ministri i Financave George Osborne ka deklaruar se kontributi i ndihmës angleze do të jetë 7 miliardë euro.
Top Channel
