Partia Socialiste ka deklaruar gjatë një konference për shtyp pasditen e së hënës se, ministrja e Integrimit Majlinda Bregu, ka manipuluar të dhënat e Qendrës Kombëtare të Regjistrimit, duke i ndërruar pas akuzave të bëra nga PS-ja, statusin e kompanisë që zotërohet nga bashkëshorti i saj.
Sipas PS-së, statusi aktiv i kompanisë që zotërohet nga bashkëshorti i saj është ndërruar me statusin i pezulluar vetëm, në orët e fundit.
“Në një dokument të marrë nga QKR-ja jo më larg se dy ditë më parë Namik Ajazi konfiguron ortak dhe me statusin aktiv. Me ndërhyrjen e Bregut sot QKR-ja ka zbatuar urdhërin e ministres. Vetëm 50 minuta më pas zbatohet urdhëri i ministres duke e shpallur kompaninë me status të pezulluar”, është shprehur Xhaçka.
Më herët ministrja e Integrimit, Majlinda Bregu përmes një deklarate për mediat pranoi se bashkëshorti i saj është pjesë e një kompanie “Mia InTernational”, por sqaroi se kjo kompani është inaktive me status pezull në Qendrën Kombëtare të Regjistrimit, e cila nuk ka funksionuar asnjë ditë, as nuk ka kryer transaksione bankare apo nënshkruar kontrata të asnjë lloji, por sipas ministres është regjistruar me qëllimin e mirë të një grupi investitorësh italianë për të pastruar mbeturinat nëpër qytete, përfshi edhe Tiranën.
Ministrja e Integrimit deklaroi se, tre muaj pas regjistrimit të kompanisë, në pamundësi për të ndjekur këtë aktivitet, bashkëshorti paraqiti letrat e dorëheqjes.
Ministrja Bregu u shpreh se statusi “pezulluar” i kompanisë, mund të vërtetohet lehtësisht në faqen e internetit të Qendrës Kombëtare të Regjistrimit.
Top Channel
