![](https://top-channel.tv/wp-content/uploads/2024/06/RUTYTE_sd-800x450.jpg)
Policia gjermane ka mbyllur xhaminë e qytetit të Hamburgut, ku atentatorët e 11 shtatorit u takuan para se të kryenin sulmet vetëvrasëse në SHBA në vitin 2001.
Agjentët e policisë deklaruan se dyshojnë se xhamia Taiba po përdorej sërish si një vend takimi për ekstremistët islamikë.
Një raport i hartuar vitin e kaluar nga shërbimet sekrete gjermane thoshte se shumë myslimanë radikalë kanë udhëtuar drejt kampeve të stërvitjeve në Uzbekistan pasi ishin mbledhur më parë në xhaminë në fjalë.
“Ne e mbyllëm xhaminë për shkak se ajo ishte një pikë takimi dhe rekrutimi për ekstremistët islamikë që donin të merrnin pjesë në atë që ata e quajnë lufta e shenjtë”, ka deklaruar Frank Reschreiter, zëdhënës i Ministrisë së Brendshme.
Ai ka shtuar se 20 agjentë policie kontrolluan objektin e kultit dhe sekuestruan një sërë materialesh, mes të cilave disa kompjutera.
Top Channel