Nipi i vjedh gjyshit kursimet e pensionit

Dhjetë ditë më parë është paraqitur në Komisariatin nr. 4 një i moshuar, ish-partizan.

Ai ka denoncuar para uniformave blu humbjen e parave, të cilat i mbante në shtëpi.

I moshuari nuk kishte asnjë dyshim te familjarët, ndaj dhe iu drejtua policisë.

Nëse i nipi nuk do të ishte larguar për disa ditë, asnjëherë nuk do të kishte vënë gishtin mbi të.

Burime policore thanë se 20-vjeçari Spartak Snoli u kthye në i dyshuar sapo ai kishte lënë për disa ditë banesën, ku kishte shkuar me shokët për turizëm në Durrës, Vlorë, Sarandë.

I riu, kur ishte kthyer nga pushimet, u akuzua nga i gjyshi se ai ishte vjedhësi i parave dhe askush tjetër.

I nipi nuk pranonte të kishte bërë një gjë të tillë, ndaj dhe policia e ka thirrur për të dëshmuar nëse kishte apo jo dijeni për vjedhësin.

Teksa ka parë policët të kërkonin me ngulm hajdutin, në revoltë e sipër iu ka thënë se ishte ai hajduti dhe se s’kishin pse kërkonin diku tjetër.

Po ashtu, në këtë moment sinqeriteti, Spartaku ka thënë se nuk e kuptonte impenjimin e madh të policisë, pasi ai kishte marrë paratë e familjes së tij, gjyshit të tij dhe nuk kishte pse të bëhej e madhe.

Kaq ka mjaftuar që gjyshi t’i thotë në sy të hetuesve se e kishte falur dhe paratë t’i bënin mirë.

I moshuari, i zënë ngushtë për rastin në fjalë, i ka shpjeguar policisë se ai i jepte gjithnjë para sa herë kërkonte nipi dhe nuk e kishte menduar se ai mund t’i bënte këtë të keqe.

Top Channel