Pas raportimeve të mediave serbe se një gazetar i agjencisë “Tanjug” është sulmuar në veri të Mitrovicës, policia e Kosovës bën të ditur se bëhet fjalë vetëm për një plumb qorr që ka rënë mbi automjetin e kësaj agjencie.
Mbrëmë gazeta serbe “Blic” raportoi se automjeti i korrespondentit të agjencisë serbe të lajmeve në Mitrovicë, Zhelko Tvërdishic, ishte qëlluar me armë zjarri.
Policia e Kosovës ka kryer një hetim dhe mbi pjesën e sipërme të makinës së Tvërdishic është gjetur një plumb i kalibrit nëntë milimetërsh, raportoi gazeta serbe “Blic”.
I kontaktuar në telefon nga Top Channel, zëdhënësi i Policisë së Kosovës për rajonin e Mitrovicës, Besim Hoti tha se kjo ngjarje është fryrë nga mediat serbe dhe se nuk bëhet fare fjalë për një sulm kundër gazetarit.
Hoti tha se, gazetari e ka gjetur makinën të shpuar nga plumbi kur është kthyer ta marrë atë në një vendparkim.
Top Channel
