Presidenti priti në një takim të veçantë, kryetarin e Asamblesë së Republikës së Maqedonisë, Talat Xhaferi.
Në takim Presidenti Meta theksoi se “mezi presim anëtarësimin e Maqedonisë në NATO dhe e siguroi Kryeparlamentarin Xhaferi për mbështetjen e fortë të Shqipërisë në këtë drejtim”.
Duke vlerësuar tendencën pozitive për zgjidhjen e çështjes së emrit, Presidenti Meta nënvizoi se, stabiliteti dhe zhvillimi i Maqedonisë është në interesin e drejtpërdrejtë të Shqipërisë, por edhe për të gjithë rajonin.
Presidenti Meta shprehu besimin për miratimin së shpejti të ligjit për gjuhën shqipe nga Parlamenti i Maqedonisë, duke theksuar se ky akt do të ndihmonte në përmirësimin e mëtejshëm të marrëdhënieve ndër-etnike në Maqedoni.
Të dy bashkëbiseduesit vlerësuan takimin e parë midis Qeverive të të dy vendeve, si dhe ndanë të njëjtin mendim se zhvillimet e sotme rajonale dhe globale kërkojnë një bashkëpunim dhe ndërlidhje edhe më të mirë, infrastrukturore, energjetike dhe njerëzore midis dy vendeve.
Top Channel
