Itali, në Lombardi dhe Veneto votohet për autonomi

Lombardia, që ka edhe kryeqytetin financiar të Italisë, Milanon, dhe rajoni i Venetos, përreth Venecias, janë përgjegjëse për 30 për qind të pasurisë së vendit.

Referendumet u organizuan nga dy liderët rajonal, Roberto Maroni i Lombardisë dhe Luca Zaia i Venetos. Sipas tyre veriu po paguan edhe për jugun e varfër.

Një votë pro pritet në të dyja proceset por rezultatet nuk janë të detyrueshme. Megjithatë fitorja e “Po-së” do t’u jepte presidenteve të rajoneve më shumë fuqi, të tilla si pozita më të favorshme në negociatat për çështjen e taksave e gjithashtu marrje të përgjegjësive nga Roma.

Të dyja rajonet udhëhiqen nga liga veriore, anti-emigrantëve dhe anti-europiane. Mediat italiane raportojnë se deri në 12:00 të drekës pjesëmarrja në Veneto ishte 21.1 përqind. Në mënyrë që votimi të jetë i vlefshëm duhet të arrihet kuorumi, 50 përqind plus një e sipas parashikimeve pjesëmarrja pritet ta kaloje 60 përqindëshin.

11.6 ishte pjesëmarrja ne Lombardi në 5 orët e para të votimit e megjithatë atje kuorumi nuk është i nevojshëm. Në këtë rajon debuton për herë të parë votimi elektronik që shkaktoi disa polemika.

Në fakt, metoda e re solli vonesa në njoftimin e të dhënave të para për nivelin e pjesëmarrjes. Deri në mesditë krahinat më aktive ishin Trevizo dhe Bergamo ku pjesëmarrja ishte më e lartë se në zonat e tjera Qendrat e votimi u hapën ne 07:00 të mëngjesit e do të mbyllen ne 23:00 të natës.

Qytetarët e thirrur për të thënë fjalën e tyre mbi autonominë janë 12 milionë, 7.9 në Lombardi e 4 milionë në Veneto.

Top Channel