Stuhia tropikale “Nate” ka marrë të paktën 22 jetë njerëzish në Kosta Rika, Nikaragua dhe Honduras, ndërsa trajektorja e lëvizjes së saj është drejt Shteteve të Bashkuara.
Vendet e Amerikës Qendrore, ku mbi 20 persona të tjerë rezultojnë të zhdukur, janë detyruar të shpallin gjendjen e jashtëzakonshme. Rreth 400 mijë vetë në Kosta Rika janë pa ujë të rrjedhshëm e mijëra të tjerë po flenë nëpër strehime të përkohshme.
“Nate” është përplasur mbi zonat në rrugën e tij me shira të rrëmbyer e erëra të dhunshme, duke lënë pas rrëshqitje masive dheu, përmbytje, bllokim rrugësh, ura të shembura e shtëpi të dëmtuara.
Tetë vetë humbën jetën në Kosta Rika, 11 të tjerë në Nikaragua, kur stuhia nisi të lëvizte në veri, e 3 janë viktimat në Honduras, dy prej të cilëve të rinj të mbytur në lumë. Ekipet e emergjencës raportojnë edhe për një të vdekur nga rrëshqitjet e tokës në El Salvador.
Qendra Kombëtare e Uraganëve në Shtetet e Bashkuara parashikon deri në 38 cm shi me mbërritjen e stuhisë. Ekspertët besojnë se, “Nate” do të marrë fuqi e do të kthehet në uragan të kategorisë së parë, përpara se të prekë tokën të dielën, në brigjet jugore të Shteteve të Bashkuara, duke rrezikuar kështu të kthehet në stuhinë e tretë të fuqishme që godet rajonin këtë vit.
Banorët e Floridës dhe Teksasit, të përballur tashmë me furinë e motit, janë këshilluar të përgatiten edhe njëherë për kapriçot e natyrës, ndërsa ende nuk e kanë marrë veten nga dëmet e uraganëve “Harvey” dhe “Irma”.
Top Channel
