Emiliano Shullazi kërkon që gjykimi kundër tij të vijojë sipas ndryshimeve të reja ligjore të hyra në fuqi në kuadër të reformës.
Bashkë me 4 të pandehur të tjerë, Shullazi këmbënguli përmes avokatëve që të zbatohen risitë e Kodit të Procedurës Penale të 1 gushtit 2017.
Në to parashikohet gjykimi me trupa 3-anëtarëshe, ndërkohë që që prej vitit 2004 Krimet e Rënda kanë në përbërje trupa me 5 gjyqtarë.
Qëndrimi i mbrojtjes, që siç ngjan po synon të riformojë trupën gjyqësore, u hodh poshtë nga Krimet e Rënda. Në këtë pikë avokatët kërkuan përjashtimin nga gjykimi të 5 gjyqtarëve që gjykojnë Shullazin.
“Do ta ngremë problemin edhe në instancat e tjera sepse mosrespektimi i kësaj dispozite bën që procesi të mos jetë në rregull ligjërisht dhe, çka është më e rëndësishme, që vendimmarrja e kësaj gjykate të bëhet nul”, ka deklaruar avokati Vladimir Meçe.
Por a po synon mbrojtja me këtë lëvizje të kthejë të pavlefshëm rrëfimin e dëshmitarit të mbrojtur Besnik Musaj, që foli kundër Shullazit para 5 gjyqtarëve? “Nuk do ta zbulojmë që tani strategjinë tonë”, ka thënë Meçe.
Por ndryshimet që po shfrytëzohen si kartë nga të pandehurit kanë përçarë edhe vetë gjyqtarët e të dyja shkallëve të Krimeve të Rënda.
Nga njëra anë gjykata e shkallës së parë ka vendosur të gjykojë me 5 anëtarë çdo proces të nisur më herët, nga ana tjetër shkalla e dytë është e ndarë në dy grupe.
Një pjesë e gjyqtarëve i lexojnë ndryshimet e reja njësoj si shkalla e parë, duke formuar trupa me 3 anëtarë vetëm për dosjet që do vijnë për t’u gjykuar pas 1 gushtit, ndërsa të tjerë kanë vendosur reformimin me 3 anëtarë për 2 çështje të vjetra në gjykim.
Top Channel
