Skema e administratës “Obama” për të mbrojtur emigrantët e rinj pa dokumente do të eliminohet. Prokurori i Përgjithshëm i Shteteve të Bashkuara të Amerikës, Jeff Sessions konfirmoi zyrtarisht vendimin e qeverisë, duke thënë se programi i njohur me siglën “DACA”, të cilin e cilësoi një mënyrë për të shmangur ligjet e emigracionit, do të zhbëhet gradualisht.
“DACA”, ose Shtyrja e Veprimit ndaj Emigrantëve Fëmijë, u miratua nga presidenti amerikan Barack Obama në vitin 2012 dhe mbron rreth 800 mijë emigrantë, kryesisht nga vendet latine, që mbërritën në SHBA ilegalisht si të mitur.
Presidenti Donald Trump u shfaq i ashpër ndaj emigracionit gjatë fushatës dhe premtoi anulimin e “DACA”-s sapo të zgjidhej, megjithëse më vonë pranoi se ishte një temë shumë e vështirë.
“Kombi duhet t’i vendosë një kufi numrit të emigrantëve që pranojmë çdo vit. Nuk mund të pranojmë këdo që dëshiron të vijë këtu, kaq e thjeshtë është”, tha Jeff Sessions, kryeprokuror i SHBA-ve.
Vendimi i qeverisë u sulmua nga demokratët dhe kreu i Dhomës së Përfaqësuesve, Nancy Pelosi e cilësoi një akt politik mizor frike. Programi “DACA” u ofron emigrantëve të jashtëligjshëm, që kanë mbërritur në SHBA si të mitur, leje pune dhe studimi, duke i mbrojtur nga deportimi. Në këmbim të dosjes së pastër, studimeve të diplomimit apo shërbimit ushtarak, SHBA shtyn me dy vite çdo veprim ndaj statusit të tyre të emigrimit.
Top Channel
