Temperaturat e larta të stinës kanë bërë që të rritet ndjeshëm numri i të sëmurëve me simptoma kardiake si dhe ato të frymëmarjes.
Mbi 180 të sëmurë në ditë paraqiten në Urgjencën e Spitalit Rajonal të Beratit, ku pjesa më e madhe janë me sëmundje kardiake.
Mjeku kardiolog Julian Ranxha pohon se kur fluksi i të sëmurëve sa vjen dhe shtohet, ai është i vetmi mjek që duhet të përballojë dyndjet me këtë lloj patologjie.
“Duhet të përballoj vizitat, konsultat, të sëmurët kardiakë që i shtroj unë, operimet, femrat shtatzënë, fëmijët… Përveç kësaj, duhet të jem në gadishmëri natë e ditë kur ka ngarkesë. Është e papërballueshme fizikisht”, thotë mjeku.
Pacientët thonë se është e patolerueshme që spitali rajonal ka vetëm një mjek.
“Kam ardhur nga Skrapari. Kam 4 ditë radhazi që jam këtu dhe një doktor nuk e përballon dot. Fluks i paparë dhe vetëm një doktor zemre nuk ka se çfarë bën”, thotë një pacient.
Gjatë gjithë vitit, numri i të sëmurëve me sëmundjet kardiake është në rritje, ndërsa problem ngelet mungesa e theksuar e mjekëve specialistë në këtë institucion shëndetësor që u vjen në ndihmë mijëra qytetarëve, jo vetëm nga Berati, por edhe nga qytetet dhe fshatrat përreth.
Top Channel