Mirald Metallari do të dalë të enjten para Gjykatës së Krimeve të rëndë për tre vepra, atë të vrasjes për shkak të marrëdhënieve familjare që i mori jetën të atit Miftar Metallari, vrasjes së ngelur në tentativë të të ëmës Nurie Metallari dhe mbajtje pa leje të armëve luftarake.
Prokuroria e Krimeve të Rënda dorëzoi kërkesën në gjykatë, në të cilën kërkon arrest me burg ndaj Mirald Metallarit, ndërsa shpjegon dinamikën se si ndodhi krimi i dyfishtë.
Prokurori thotë pas një konflikti të momentit mes dy burrave, babë e bir, viktima një efektiv policie, e ka goditur të birin me grusht.
Konflikti i momentit ndodhi pasi i riu gjatë punimeve në shtëpi kishte rrëzuar pa dashje karrocën me llac dhe pasi ai është goditur nga i ati, ka hyrë në banesë duke marrë armën e viktimës.
Në këtë moment e ëma ka dalë përpara për të parandaluar ngjarjen, por edhe ajo është qëlluar prej të birit, i cili më pas ka zbrazur pesë plumba mbi të atin Miftar Metallari.
Dëshmia e Mirald Metallari
Më datë 24.07.2017 rreth orës 06:00 të mëngjesit, ka ndihmuar të atin (Miftarin) për të bërë disa punime në oborrin e shtëpisë së tyre dhe kur ka qenë duke punuar, rreth orës 11:00, në një moment i është derdhur karroca e mbushur me llaç në tokë. I ati e ka gjuajtur me grusht në pjesën e buzës dhe pas këtij veprimi, Mirald-i ka hyrë në banesë, ku aty kanë qenë 2 (dy) motrat e tij, të cilat kanë dal jashtë dhe ky ka shkuar te dhoma e të atit . Aty ka marrë armën e shërbimit të babait dhe pasi ka dal me armë në dorë te dera, ka vërejtur të ëmën shtetasen Nurie Metallari, e cila ka tentuar ta ndaloj dhe në këtë moment ai e ka shkrepur armën me drejtim nga dyshemeja. Nëna e tij ka dashur përsëri ta ndaloj, por Miraldi ka qëlluar me armën e zjarri në drejtim të saj në një distancë prej 3 (tre) metrash. Ndërkohë, i ati, Miftari, ishte duke ardhur në drejtim të Mirald-it, ky i fundit ka hapur zjarr edhe ndaj tij duke mbaruar të gjithë fishekët që kishte në karikatorin e pistoletës. Më pas Mirald-i thekson se ka shkuar te e ëma, e cila ishte shtrirë përtokë në verandën e shtëpisë, e ka marrë atë dhe e ka futur në makinën e tij, me qëllim për ta dërguar në spital. Me vete ka patur edhe armën e zjarrit që kishte kryer ngjarjen. Ai është nisur për në Spitalin e Traumës Laprakë, kur ka qenë në hyrje të rrugës për te spitali e ka ndaluar një patrullë policie, dhe e ka shoqëruar atë në mjetin e policisë, ndërsa të ëmën e kanë dërguar në Spitalin e Traumës Tiranë. Në deklarimin e tij ky shtetas thekson se armën ua ka dorëzuar vet punonjësve të policisë. Në shpjegimet e tij ky person sqaron se nuk ka patur konflikte të mëparshme me të atin .
Top Channel
