Kryetari i Bashkisë së Tiranës, Erion Veliaj inspektoi sot punimet që po kryhen për shtrimin e rrugëve të brendshme tek Parku i Liqenit.
Veliaj theksoi se të gjitha agjencitë e bashkisë do të jenë në terren gjatë gjithë verës për t’u siguruar që qytetarët në shtator të kenë një ambient sa më dinjitoz për të kaluar kohën e lirë.
“Pavarësisht investimeve tona në parkun e Farkës, në parkun e Kasharit, le të themi se kurora e gjelbër e Tiranës, pra Parku i Liqenit vijon të jetë më i frekuentuari nga qytetarët. Në rrugët e brendshme të tij nuk është ndërhyrë që nga vitet ‘60-70, çka ka bërë që me gjithë investimet që ka bërë Bashkia, të përdoret vetëm 10% e territorit të parkut. I gjithë investimi në rrugët e reja, të brendshme dhe lidhëse me pjesët më interesante të parkut, do të zgjasë vetëm dy muaj. Në fund të verës i gjithë parku do të jetë i vizitueshëm”, tha Veliaj.
Ai kërkoi mirëkuptimin e qytetarëve për punimet që po kryen paralelisht në disa zona të kryeqyetit, ndërsa paralajmëroi mbjelljen e 50 mijë pemëve në shtator. Gjithashtu, Veliaj iu përgjigj edhe akuzave për prishjen e një lulishteje për ndërtimin e një pallati.
“Le të fokusohemi tek projektet, tek punët konkrete dhe jo tek histerizmat kolektive që nisin sa herë bashkia realzion një projekt të madh”, tha Veliaj.
Top Channel
