“Informacione për gati 200 milionë shtetas amerikanë janë hedhur aksidentalisht ‘online’ në fillim të muajit”, thonë mediet në Shtetet e Bashkuara, ndërsa incidenti raportohet vetëm tani.
Bashkë me të dhënat personale, në rrjet kanë përfunduar edhe opinionet politike të këtyre njerëzve, që përbëjnë gati 62% të të gjithë popullatës në SHBA.
Gabimi i faturohet një shoqate marketingu të punësuar nga Komitetit Kombëtar Republikan, “Deep Root Analytics”.
Edhe pse dihet që partitë në vend mbledhin detaje mbi votuesit, kjo sipas BBC-së përbën shkeljen më të madhe deri tani në raport me të dhënat zgjedhore në Shtetet e Bashkuara.
Vet firma mediatike e ka pranuar se të dhënat e ekspozuara kanë qenë në zotërimin e saj. Incidenti u zbulua nga analisti i rrezikut kibernetik Chris Vickery, i cili thotë se kushdo që e ka internetin të lidhur mund të hynte në bazën e të dhënave të votuesve, të përdorur nga republikanët në zgjedhjet presidenciale.
Serveri i “Deep Root” ka qenë publikisht i aksesueshëm nga data 1 deri më 12 qershor. Të dhënat e shfaqura aty përfshijnë edhe adresat e shtëpive të votuesve, ditëlindjet, numrat e telefonit e opnionet e tyre mbi çështjet politike.
Firma nuk mendon se sistemi i saj është sulmuar në mënyrë pirate gjatë asaj periudhe kohe, ndërsa garanton se janë marrë të gjitha masat për të parandaluar rrjedhje të tjera informacioni.
Top Channel
