Persona ende të paidentifikuar kanë qëlluar me gur, duke thyer disa nga dritaret e Kishës Katolike “Zemra e Krishtit” në kryeqytet.
Ngjarja mendohet të ketë ndodhur në orët e para të së enjtes, por është zbuluar vetëm rreth orës 6:30 të mëngjesit, kur dhe është hapur kisha.
Menjëherë, Policia e Tiranës ka nisur hetimet për të hedhur dritë mbi këtë ngjarje. Drejtues të kësaj kishe nuk kanë preferuar të komentojnë këtë ngjarje, e cila, sipas tyre, mund të jetë shkaktuar nga persona endacakë ose të dehur, pasi aty pranë është gjetur dhe një shishe me pije alkoolike.
Gjithsesi, policia e kryeqytetit është duke kontrolluar të gjithë zonën për të siguruar pamje filmike të kamerave të sigurisë të bizneseve pranë kishës.
Top Channel
