Policia britanike po vijon hetimet mbi sulmin terrorist të javës së kaluar në Londër dhe mbrëmjen e së mërkurës ka bërë tre arrestime të reja në lidhje me të.
Në edicionin e saj online, BBC raporton se arrestimet u kryen teksa agjentët e anti-terrorit bastisën një lagje në zonën lindore të Londrës.
Dy prej tyre, të moshave 27 dhe 29 vjeç, u arrestuan nën dyshimin se po përgatisnin sulme terroriste, ndërsa i treti, 33 vjeç, për furnizim të tyre me doza droge.
Të paktën 17 persona janë arrestuar gjithësej në lidhje me ngjarjen e së shtunës mbrëma, por vetëm 5 po mbahen nën kontrollin e policisë.
Tetë persona u vranë kur tre vetë vërshuan mes këmbësorëve në Urën e Londrës, duke i goditur ata me thikë, përpara se të qëlloheshin për vdekje nga policia.
Autoritetet kanë mundur të identifikojnë të gjithë autorët e sulmit. Ata janë Youssef Zaghba, një 22-vjeçar italo-maroken që jetonte në lindje të Londrës; Khuram Butt, 27 nga Barking; dhe Rachid Redouane, 30, po ashtu nga Barking.
Top Channel
