Edhe pse është konsideruar si një ndër pikat më të bukura përgjatë liqenit të Ohrit, Lini prej disa vitesh përballet me ndotje maksimale të cilat frenojnë zhvillimin e turizmit.
Derdhja e ujërave të ndotura në liqen dhe mungesa e investimeve thuajse e kanë zhdukur mundësinë që ky fshat të jetë një destinacion turistik. Edhe pse ai ofron pamje mbresëlënëse pasi shtrihet i gjithi buzë liqenit, uji i ndotur ka bërë që në breg të mos ketë asnjë pushues.
Fshati i kontrasteve edhe këtë verë duket se do të ndahet mes bukurive të natyrës dhe ndotjes e kushteve të papërshtatshme për zhvillimin e turizmit.
“Turistët që vijnë këtu janë vizitorë ditorë. Janë të akredituar në pjesën e Maqedonisë. Këtu vijnë autobusët shohin pjesën e mozaikut dhe ikin. Nuk ka ndonjë të ardhur nga këta se janë vetëm disa orë”, thotë Duro Sulo, banor i Linit.
“Këtu ka kohë që mungojnë investimet dhe kjo ka bërë që fshati Lin të ngelet si i braktisur”, thotë Gafur Avdullari, kryetari i fshatit Lin.
Fshati vizitohet kryesisht nga turistë ditorë që vijnë më tepër për bazilikën e Linit, e cila ka një mozaik që daton në shekullin VI dhe VII. Verën e kaluar, fshati ishte më pak i preferuar ndërkohë që fshatrat e tjerë të Pogradecit mbushen me turistë, për Linin nuk kujtohet askush.
Top Channel
