Macron takon Putin: Një kapitull i ri marrëdhëniesh

Sipas kreut të Elizesë, mosmarrëveshjet mes 2 vendeve kishin qenë në fokus të takimit të mbajtur në pallatin e Versajës, por ai shtoi se ishte i interesuar të bashkëpunonte me Moskën lidhur me Sirinë, në betejën kundër terrorizmit.

Ndërsa numri një i Kremlinit tha se dëshironte të forconte lidhjet ekonomike me Francën, pas kufizimeve të viteve të fundit. Të dy liderët përcollën sinjale për çeljen e një kapitulli të ri në marrëdhëniet ruso-franceze, të cilat kanë qenë nën një presion të konsiderueshem kohët e fundit.

Tensionet mes tyre janë rritur për shkak të konflikteve në Ukrainë dhe Siri, ku Franca dhe Rusia mbështesin palë të kundërta. Gjithashtu ekipi elektoral i Macron pati akuzuar agjentët rusë për sulme kibernetike kundër tyre, gjatë fushatës zgjedhore për presidencën, kur Putin dukej se mbështeste nacionalisten Marin Le Pen.

Lideri i ri francez ka folur në të kaluarën për rëndësinë e komunikimit me Rusinë, edhe pse sipas tij nuk duhej hequr dorë nga gjuha e ashpër. Edhe gjatë samitit të G7-ës në Siçili, ai e vuri theksin tek rëndësia e bisedimeve me Moskën, pasi siç tha, ekzistojnë një sërë çështjesh ndërkombëtare që nuk mund të zgjidhen pa një dialog të fortë me të.

Marrëdhëniet mes Rusisë dhe Francës u krisën nën presidencën e François Hollande. Putin anuloi një vizitë në Paris, në muajin  tetor, pasi ish kreu i Elizesë tha se Rusia mund të përballej me akuzat për krime lufte për aksionet e saj në Siri.

Top Channel