Kronikë

Antiterrori, hetime për dëmtimin e shtyllës së tensionit të lartë

17/05/2017 00:00

Pas konstatimit të dëmtimit me eksploziv të një shtylle të tensionit të lartë në Kodër Thumanë të Krujës, agjentë të Antiterrorit të Tiranës kanë nisur hetimet për zbardhjen e ngjarjes dhe kapjen e autorëve.

Policia lokale u njoftua këtë të mërkurë nga OSHEE për dëmtimin e dy këmbëve mbajtëse të një shtylle të tensionit të lartë, pas konstatimit nga ana e punonjësve të saj në terren.

Në vendngjarje shkuan shërbimet e komisariatit të policisë së Krujës, të cilët siguruan vendin e ngjarjes dhe nga kryerja e veprimeve verifikuese në terren konstatuan se kanë ndodhur 2 shpërthime, rreth orës 02.00 të datës 13 maj.

Policia bëri të ditur se ka shoqëruar 5 banorë të zonës pranë shtyllës së dëmtuar, me qëllim sqarimin e plotë të ngjarjes. Të shoqëruarit kanë deklaruar se para 3-4 ditësh kanë dëgjuar dy shpërthime të njëpasnjëshme, por pa lokalizuar vendin.

Në vendngjarje policia gjeti disa mbetje eksplozivi të cilat i dërgoi në laboratorin e Policisë Shkencore për ekzaminim. Konkretisht u gjetën rreth 40 cm fitil zjarrëpërcjellës i djegur dhe mbetje prej qelqi, që është përdorur si mekanizëm për ndezje.

Top Channel