“Divorci i çastit”, shqyrtohet nga gjykata në Indi

Gjykata tha se do të shqyrtojë nëse praktika e njohur si “Triple Talaq” është thelbësore për besimin. India është një nga pak vendet në botë ku një burrë mysliman mund të divorcohet nga gruaja e tij brenda pak minutash duke thënë fjalën “Talaq”, divorc, tre herë radhazi.

Por, aktivistët thonë se praktika është diskriminuese. Shumë grupe myslimane kanë kundërshtuar ndërhyrjen e gjykatës në çështjet e tyre fetare edhe pse lëvizja ka edhe mbështetjen e kryeministrit aktual të Indisë, Narendra Modi.

Çështja e ndjeshme po trajtohet nga një panel prej pesë gjykatësish, një hindu, një sikh, një kristian, një zaorastrian dhe një mysliman. Myslimanët janë komuniteti më i madh minoritar në Indi me një popullatë prej 155 milionësh dhe martesat e divorcet e tyre rregullohen nga ligji islamik, sheriati. Edhe pse është praktikuar për dekada të tëra, divorci i menjëhershëm, nuk përmendet askund në sheriatin e shkruar apo në kuran.

Studiuesit islamikë thonë se kurani, qartësisht e përcakton mënyrën e divorcit, ajo duhet të ndodhë përgjatë tre muajsh, kohë në të cilën çifti ka kohë për reflektim dhe ripajtim.

Aktivistët thonë se shumë vende islamike, mes të cilëve Pakistani dhe Bangladeshi, e kanë ndaluar divorcin e çastit, por ai vazhdon të ekzistojë në Indi.

Vitet e fundit, shumë burra myslimanë në indi i kanë thënë bashkëshorteve të tyre se do të divorcohen nëpërmjet një letre, telefoni apo edhe nëpërmjet mesazheve SMS. Ka pasur po ashtu edhe raste kur “Skype”, “WhatsApp” apo “Facebook” janë përdorur për këtë qëllim.

Top Channel