Çështja e zgjedhjeve e ka çuar serish kryetarin e Partisë republikane, Fatmir Mediu në Uashington, ku kërkon të njohë administratën e re me qëndrimin e opozitës për 18 qershorin.
Zoti Mediu u takua me zyrtarë të Departamentit të Shtetit dhe të Shtëpisë së Bardhë, të cilëve u tha se “krimi i organizuar dhe trafiku i drogës përbën një rrezik real për demokracinë shqiptare dhe sigurinë e Europës”.
Sipas njoftimit zyrtar të Partisë Republikane, zyrtaret e Shtëpisë së Bardhë dhe Departamentit të Shtetit “theksuan se Shtetet e Bashkuara kërkojnë nga Shqipëria që të zhvillojë zgjedhje të lira dhe të ndershme dhe njëkohësisht qe zgjedhjet duhet të garantojnë pjesëmarrjen e qytetarëve dhe gjithë forcave politike”.
Gjatë qëndrimit në Uashington, Fatmir Mediu u takua me senatorin Jim Inhofe, si dhe me kongresmenë që drejtojnë komisione të rëndësishme në Kongres. Njeri prej tyre, Bob Goodlate, Kryetari i Komisionit te Drejtësisë, do të vizitojë së shpejti Tiranën.
Kongresmenët amerikanë theksuan se “zgjedhjet e lira janë detyrim për Shqipërinë dhe se, dialogu dhe krijimi i besimit te qytetarëve dhe opozitës në proces është domosdoshmëri”.
Top Channel
