Në të gjithë vendin vijojnë kushtet e rënduara të motit me temperatura disa shkallë poshtë zeros, që kanë shkaktuar probleme në jetën dhe aktivitetin e përditshëm të njerëzve. Problemet kryesore janë krijuar në qarkullimin në rrugë dhe në mjaft qytete, edhe në furnizimin me ujë të pijshëm dhe energji elektrike.
Ngricat në rrugë, akulli i krijuar, bora e hedhur për shkak të erës së fortë janë një problem i vazhdueshëm për drejtuesit e mjeteve. Strukturat e angazhuara me mirëmbajtjen e rrugëve, firmat e kontraktuara etj., kanë vijuar punën e tyre për hapjen e rrugëve nacionale të cilat qanë të qarkullueshme pa zinxhirë në pjesën dërrmuese te tyre.
Mbeten disa akse rurale ende të pahapura, ku po punohet vazhdimisht që të bëhet i mundur qarkullimi i mjeteve. Edhe gjatë ditës së djeshme ka vijuar furnizimi i zonave më të prekura me ndihma për banorët në vështirësi, të cilëve u janë shpërndarë pako me ushqime, veshmbathje etj.
Situata në akset rrugore në të gjithë vendin paraqitet si më poshtë:
QARKU SHKODËR – Në Njësinë Administrative Pult është e njëjta gjendje, temperaturat janë të ulëta dhe mungon energjia elektrike. Segmenti rrugor për në Njësinë Administrative Shalë, qarkullohet me vështirësi, pavarësisht se është pastruar nga dëbora por ka prezencë të ngricave. Vazhdon puna për zhbllokimin e rrugës në drejtim të Bregut të Lumit nga Mali i Shoshit. Segmenti për në Qafën e Malit të Shoshit hapur, por nevojiten edhe 2-3 ditë punë për zhbllokimin e rrugës Mali i Shoshit – Theth. Ditën e djeshme ka nisur identifikimi i popullatës së bllokuar në tre Njësi Administrative të Dukagjinit, si dhe nevoja për ushqime për blegtorinë në fermat e kësaj zone. Në Vaun e Dejës ka problem të furnizimit me ujë të pijshëm nga ngrirja e tubacioneve në banesa. Njësia Administrative Bushat ka të njëjta probleme me furnizimin me ujë të pijshëm për shkak të ngrirjes së tubacioneve të konsumatorëve. Njësia Administrative Hajmel rezulton me mungesë të energjisë elektrike, pasi era e fortë ka dëmtuar rrjetin elektrik të tensionit të lartë. Njësia Administrative Vig Mnelë që mbrëmë vazhdon të jetë pa energji elektrike dhe pa furnizim me ujë të pijshëm. Segmenti Qafë Bordoleci–Vermosh, trashësia e dëborës mbi 80 cm e pa kalueshme. Po punohet për zhbllokimin e këtij segmenti me një mjet borëpastruese. Rrugët e Bogës dhe Razmes janë të kalueshme me zinxhir nga të gjitha mjetet. Aksi rrugor Qafë Mali–Qafa Shllak, në territorin e rrethit Pukë është i hapur por në disa pjesë të saj qarkullohet me zinxhirë. Aksi rrugor Bardhet – Iballë ende i bllokuar por ka edhe 7 km për tu hapur. Vazhdon puna për hapjen e tij. Rrugët e tjera janë të kalueshme por mjetet e tonazhit të vogël duhet të përdorin zinxhirë për shkak të prezencës së ngricave në rrugë. Në bashkinë Fushë-Arrëz raportohet për mungesë të energjisë elektrike në fshatrat Tuc, Kokedode, Levoshe. OSHEE po punon intensivisht për rikthimin e energjisë elektrike në këto zona. Emergjenca shëndetësore nuk ka pasur. Bashkia Shkodër dhe Malësi e Madhe, po bashkëpunojnë me dy mjete për të hapur akset Qafë Thore dhe Shosh. Nga të gjithë anëtaret e KECQ vazhdon të ndiqet sistematikisht situata e krijuar nga reshjet e dëborës. Prefekti është në kontakt të vazhdueshëm me të gjithë drejtuesit e Bashkive, strukturave të Emergjencat Civile, për marrjen e informacionit për familjet më në nevojë dhe mbështetjen e tyre me ndihma ushqimore.
QARKU KUKËS – Të gjitha akset nacionale qarkullojnë pjesërisht pa zinxhirë. Në rrugën e Kombit punojnë 4 borëpastruese, por është e qarkullueshme pa zinxhirë. Segmenti Ura e Zapodit–Shishtavec punon 1 fadromë, por e qarkullueshme me zinxhirë. Aksi rrugor F-Dugagjin–Q.Shllak po punojnë 2 borëpastruese, por e qarkullueshme pa zinxhirë deri në Qendrën e Njësisë Administrative Malzi. Aksi rrugor Njësia Administrative-Qafë Shllak –Qafë Mali, e qarkullueshme me zinxhirë. Aksi rrugor B.Curri-Q.Morinë, e qarkullueshme pa zinxhirë. Aksi rrugor B.Curri-Fierzë, e qarkullueshme pa zinxhirë. Aksi rrugor Dushaj-Lekbibaj, e qarkullueshme pa zinxhirë. Aksi rrugor Bajram Curri-Valbonë, është i hapur dhe qarkullimi i mjeteve kryhet pa zinxhirë. Ka prani të erërave të forta dhe në disa vende trashësia e borës arrin deri në 100 cm. Mjetet borëpastruese janë të gjitha në punë. Aksi rrugor Ura e Bujanit-Qafë Morinë, Sopot-Kërn-Tropojë, është i hapur dhe qarkullimi kryhet pa zinxhirë. Mjetet borëpastruese janë në punë duke pastruar dëborën dhe hedhur kripë. Ka prani të erërave të forta. Aksi rrugor Bajram Curri-Kam, është i hapur por qarkullimi rekomandohet me zinxhirë sepse ka prezencë akulli. Mjetet borëpastruese janë në punë. Edhe në këtë aks ka prani të erës së fortë. Në aksin rrugor Tuneli Kalimashit-Dogana Morinë, qarkullimi kryhet pa zinxhirë. Puna vazhdon pa ndërprerje për pastrim dhe kriposje. Aksi rrugor Kukës–Bushtricë, K/Domaj–Reç është i hapur, qarkullimi rekomandohet të kryhet me zinxhirë, për shkak të akullit. Mjetet borëpastruese janë në punë. Aksi rrugor Kukës–Ura e Zapodit qarkullohet pjesërisht me zinxhirë dhe është bërë dhe kriposja e tij. Në aksin rrugor Krumë-Qafë Prush, Plepa-Kam, punojnë 2 borëpastruese, por qarkullimi kryhet me zinxhirë. Në Qafë Prush ka rreth 40-60 cm borë. Në aksin rrugor Shote Galica-Qendër, Kukës-Krumë, rruga është e hapur, por qarkullimi rekomandohet me zinxhirë. Dëbora në Qafën e Toblit arrin deri në lartësinë 50 cm. Mjetet borëpastruese janë në gatishmëri. Nëpër kthesa të ekspozuara era e fortë ka mbledhur rreth 1.5-2 m borë. Është hedhur kripë për të eleminuar ngricat. Të gjithë kontraktorët janë në gatishmëri me mjete dhe fuqi punëtore. Aksi rrugor për në Njësinë Administrative Arrën është i bllokuar. Janë të bllokuara disa fshatra në lartësi të mëdha sidomos në Njësitë administrative Lekbibaj, Margegaj, dhe Tropojë e Vjetër. Në Njësinë Administrative Malzi, fshati Çam ka problem me furnizim me energji elektrike. Komisioni i Emergjencave Civile vazhdon të ndjekë situatat sipas informacioneve të marra duke e shoqëruar me detyrat përkatëse.
QARKU LEZHË – Në aksin rrugor Rrëshen – Tuneli i Thirrës, janë marrë masat për pastrimin dhe hedhjen e kripës. Qarkullimi kryhet pa zinxhirë, në të gjithë aksin. Aksi rrugor Kurbnesh-Lurë është i qarkullueshëm me zinxhirë. Rrugët rurale Bulshar – Nënshejt – Lajthizë dhe Reps – Gurth – Spaç janë të bllokuara. Në të gjithë territorin e qarkut vazhdojnë temperaturat e ulëta, probleme me rrugët dhe në disa zona ka probleme me ujin e pijshëm. Deri tani nuk ka probleme në jetën e njerëzve, blegtori dhe banesa. Në territorin e Bashkisë Mirditë, vazhdon akoma situatë e vështirë për shkak të kushteve klimaterike, situatë e cila po mbahet në kontroll të vazhdueshëm nga Komisioni i Emergjencave Civile.
QARKU ELBASAN – Në aksin rrugor Elbasan – Qafë Thanë, është bërë pastrimi i aksit dhe është hedhur kripë, për shkak të ngricave. Qarkullimi kryhet pa zinxhirë. Aksi rrugor Elbasan – Gjinar po pastrohet dhe kriposet, në vendet ku ka ngrica. Qarkullimi kryhet pa zinxhirë. Në aksin rrugor Librazhd – Stëblevë, qarkullimi kryhet pjesërisht me zinxhirë për shkak të ngricave. Aksi rrugor Tiranë-Dalja e Tunelit-Elbasan nuk ka probleme për qarkullimin. Është pastruar dhe spërkatur me kripë.
QARKU KORÇË – Gjatë natës ka pasur temperatura shumë të ulëta dhe erë të fortë, e cila ka hedhur dëborë mbi segmente të ndryshme të rrugës. Në aksin rrugor Njësia Administrative Boboshticë-Dardhë dhe Korçë-Voskopojë qarkullimi i mjeteve bëhet me zinxhirë. Në aksin rrugor Korçë- Ersekë në Qafën e Qarrit qarkullimi i mjeteve bëhet me zinxhirë. Kompanitë e mirëmbajtjes vazhdojnë të punojnë për pastrim dhe kriposje të akseve rrugore që kanë me kontraktim. Të gjitha akset e tjera të qarkut Korçë janë të kalueshme pa zinxhirë.
QARKU DIBËR – Aksi rrugor Kuben – Vasie, është i hapur, por qarkullimi kryhet me zinxhirë. Edhe në aksin rrugor Peshkopi – Qafë Drajë, qarkullimi bëhet me zinxhirë. Mjetet borëpastruese janë të gjitha në punë. Në aksin rrugor Qafë Bualli–Peshkopi–Maqellarë–Bllatë qarkullimi kryhet me zinxhirë. Aksi rrugor Ura–Komsi–Ulëz–Ura e Matit është i hapur dhe qarkullimi kryhet pa zinxhirë. Mjetet borëpastruese janë në punë. Në aksin rrugor Ura e Qytezës-Zerqan, Ura e Cerenecit – Stëblevë, qarkullimi bëhet me zinxhirë. Në aksin rrugor Skuraj–Qafë Bualli qarkullohet pa zinxhirë. Në aksin rrugor Qafë Bualli – Krastë, qarkullimi bëhet me zinxhirë. Ky aks është trajtuar me kripë për shkak të ngricave.
QARKU TIRANË – Aksi rrugor Qafë Priskë-Qafë Mollë është i kalueshëm me zinxhirë. Akset e tjera rrugore janë të kalueshme pa zinxhirë. Në orët e para të mëngjesit ka pasur prezencë ngrice në disa segmente rrugore. Komisioni Emergjencave i Bashkisë Tiranës ka monitoruar e menaxhuar situatat që janë evidentuar duke i dhënë zgjidhje të menjëhershme nëpërmjet aktivizimit të forcave Operacionale që veprojnë në terren. Grupet e punës së Ujësjellës Kanalizime kanë punuar për riparimin e defekteve në tubacione si pasojë e çarjes së tubave të ujit nga ngricat.
QARKU VLORË – Si pasojë e reshjeve të borës ditën e djeshme dhe sot në mëngjes ka pasur prezencë ngrice në Qafën e Muzinës. Policia rrugore po monitoron situatën dhe rekomandon drejtuesit e mjeteve të përdorin zinxhirët në segmente të caktuara. Në Qafën e Llogarasë firma kontraktore ka vazhduar punën për pastrimin e rrugës. Kalimi i automjeteve kryhet pa zinxhirë. Furnizimi me energji elektrike është kryer normalisht.
Top Channel
