Fondi Monetar Ndërkombëtar dhe Banka Botërore kanë njoftuar këtë të martë se do të bashkojnë forcat, së bashku me disa organizata të tjera ndërkombëtare, për të bashkëpunuar mbi çështjet e evazionit fiskal dhe për zhvillimin e mjeteve e standardeve të tjera për taksimin e sipërmarrjeve shumëkombëshe.
Grupi i ri, i cili do të përfshijë gjithashtu edhe Kombet e Bashkuara dhe Organizatën për Bashkëpunimin Ekonomik dhe Zhvillimin (OECD), do të fokusohet veçanërisht në krijimin e sistemeve efektive të taksave në vendet në zhvillim, si dhe do të përpiqet të shmangë erozionin e taksave.
Vendimi i këtyre organizatave partnere për të bashkëpunuar formalisht i ka rrënjët edhe më herët sesa të shpërthente skandali i ashtuquajtur “Panama Papers”, apo “Letrat e Panamasë”, në fillim të këtij muaji, gjë që vuri në pah përdorimin e gjerë të “parajsave fiskale” nga individë tepër të pasur për të shmangur pagimin e taksave.
Megjithatë, një zyrtar i FMN-së tha se grupet në fjalë e kanë mirëpritur vëmendjen e përforcuar mbi çështjen e taksave, pas asaj që shkaktoi skandali i Panamasë.
Top Channel
