Pas dështimit të Marco Rubios, një prej të preferuarve të establishmentit republikan për nominimin presidencial në zgjedhjet e nëntorit në SHBA, si dhe pas përjashtimit që i bëri vetëm një ditë më parë Paul Ryan, kreu i Dhomës së Përfaqësuesve, një kandidimi të mundshëm si i përzgjedhur në Konventën e korrikut, tashmë vjen një lajm i mirë, nëse mund të quhet i tillë, për republikanët.
Një gjykatë në New Jersey ka marrë një vendim në favor të kandidatit të mundshëm të republikanëve, Ted Cruz, senator nga Teksasi, duke i dhënë atij ligjshmërinë e plotë për të garuar në të ashtuquajturat “primare”, por edhe në zgjedhjet presidenciale të nëntorit, nëse fiton nominimin e partisë së tij.
Teksani i lindur në Kanada, nga një baba kuban dhe nënë amerikane, ishte paditur nga një grup qytetarësh amerikanë, të cilët vinin në dyshim ligjshmërinë e kandidaturës së tij në “primaret” e qershorit në New Jersey. Por gjykata ka vendosur se ai është “një shtetas lindur natyrshëm” nën Kushtetutën amerikane, gjë që e bën atë një shtetas mirëfilli amerikan. Sipas gjykatësit Jeff Masin, senatori Cruz përmbush të gjitha kërkesat kushtetuese për të garuar për president.
Këtë rast nuk e ka lënë pa shfrytëzuar as rivali kryesor i Cruzit për nominimin republikan, Donald Trump, i cili ka hedhur gjithashtu dyshime mbi të drejtën e tij për t’u zgjedhur si kandidat për president. “Ekziston një pikëpyetje e madhe mbi kokën tënde”, i ka thënë manjati i pasurive të paluajtshme rivalit teksan gjatë një debati në janar. “Nuk mundesh t’ia bësh atë partisë tënde”.
Një komitet i qytetarëve të shqetësuar në pjesës jugore të shtetit të New Jerseyt dhe profesori i ligjeve, Victor Williams, argumentuan në gjykatë gjatë së hënës se lindja e senatorit Cruz në Kanada nënkupton që ai nuk është “shtetas i lindur natyrshëm” në SHBA, sipas përcaktimit të asaj që është shkruar në Kushtetutën amerikane. Ata pretendonin se ai ishte një shtetas i natyralizuar, ndërsa thanë se presidentët duhet të jenë të lindur në tokën amerikane. Por këtyre argumenteve, avokati i Cruzit iu përgjigj me faktin se ai është lindur nga një nënë amerikane, çfarë e bën atë shtetas të ligjshëm amerikan.
Top Channel
