Athinë, kapen shqiptarët me 3 kilogramë kokainë

Sipas Policisë së Athinës, në flagrancë janë arrestuar Ergjys Seko, Mario Lesko dhe Fabiola Veizaj, përkatësisht 33, 35 dhe 29 vjeç, dhe është shpallur në kërkim një 38-vjeçar shqiptar, emri i të cilit nuk bëhet publik për momentin.

Arrestimi i tyre u bë në lagjen e quajtur Argjirupoli, pasi prej kontrolleve të kryera iu gjet sasia prej 2 960 gramë kokainë e pastër, 6 kilogramë kanabis, sasia prej 65.400 eurosh, 3 peshore elektronike, 1 autoveturë që shërbente për transportin e lëndës narkotike,1 pistoletë me dy krëhëra fishekësh si dhe 9 telefona celularë.

Policia tha se kishte informacione në rrugë operative se organizata kriminale importonte lëndën narkotike nga Shqipëria dhe në vazhdim e shpërndanin atë në piacën e narkotikëve në Athinë.

Autoritetet greke thanë se lënda narkotike e bllokuar kishte një vlerë prej më shumë se 220.000 eurosh.

Të arrestuarit dhe materialet në ngarkim të tyre iu dërguan Gjykatës së Athinës, e cila vendosi t’i lërë në burg deri në përfundim të hetimeve.

Top Channel