Tiranë, klonuesit e kartave në gjykatë; arrest me burg për 5 prej tyre

Nëpërmjet kartave të klonuara, personat në fjalë dyshohen se kanë tërhequr shuma të konsiderueshme parash në bankomatet e një banke të nivelit të dytë.

Gjykata i konsideroi të ligjshëm urdhërat e ndalimit të prokurorisë dhe vendosi masat e sigurisë për shtetasit:

D.Ç, “arrest në burg” në mungesë; Denilson Dusha, “arrest në burg”; Marius Shehi, “arrest në burg”; Sajmir Krasnaj, “arrest në burg”; Klodjan Kukli, 15 ditë “arrest në burg”; Egli Kukli, “detyrim për paraqitje”; Besmir Kollçaku, “detyrim për paraqitje”; Andi Hylviu, “detyrim për paraqitje”.

Këta shtetas, me banim në Lushnje dhe Kavajë, pasi kanë falsifikuar karta debiti kanë tërhequr shuma të ndryshme në bankomate në disa qytete dhe i kanë shpenzuar ato për blerje karburanti për automjetet e tyre, ose për sende të tjera.

Prokuroria e kryeqytetit nisi hetimet mbi këtë rast pas sinjalizimeve të bankës së nivelit të dytë, e cila kishte konstatuar ndërhyrje në sistemin e saj përmes një karte amerikane të klonuar.

Nga hetimet ka rezultuar më pas se personat përgjegjës kanë tentuar të kryejnë transaksione edhe me karta të tjera, por ajo që u ka funksionuar ka qenë ajo amerikane.

Në vijim të hetimit, nga ana e Prokurorisë së Tiranës po punohet për të saktësuar shumën e plotë të marrë prej tyre nëpërmjet klonimit të kartave të debitit.

Top Channel