Terroristët në mesin e refugjatëve, Shulz: Mos i gjykoni!

Megjithatë, presidenti i Parlamentit Europian Martin Schulz kërkoi të bëhet kujdes e për sulmet e përgjakshme të së premtes, të mos fajësohen refugjatët sirianë. Gjatë një interviste të dhënë në Berlin, Schulz bëri thirrje të mos vihet shenja e barazimit mes autorëve të krimit e atyre që janë edhe vetë viktima.

“Njerëzit që marrin arratinë nga Siria duke shtrënguar fëmijët e tyre në krah, njerëz që ikin nga sytë këmbët vetëm me rrobat e trupit e asgjë tjetër, i largohen mes të tjerash Shtetit Islamik, të njëjtës organizatë përgjegjëse për sulmet e Parisit. I largohen të njëjtit terror dramatik që po përjetojmë ne sot, i cili në atë zone për të cilën flasim, është thuajse pjesë e jetës së përditshme”, tha Martin Schulz, president i Parlamentit Europian.

Masakra e kryeqytetit francez nxiti thirrjet që Bashkimi Europian të mbyllë kufijtë për azilkërkuesit, por zgjidhjen e situatës, Schulz nuk e sheh tek kthimi i emigrantëve mbrapsht. Ajo sipas tij, do të gjendet duke përmirësuar nivelin e shkëmbimit të informacioneve, duke forcuar mbrojtjen e kufijëve e duke vendosur kontrolle më të rrepta të pasaportave.

Ndërkohë, nga Turqia ku mori pjesë në samitin e G20-tës, kryeministri britanik David Cameron deklaroi se dallimet e qëndrimeve mbi të ardhmen e presidentit sirian Bashar Al Assad, sa vjen e ngushtohen. Sigurisht, ka ende mosmarrëveshje mes atyre që mendojnë se Assadi duhet të largohet menjëherë e të tjerëve si presidenti Putin që vazhdojnë ta mbështesin, tha Cameron, por hendeku është reduktuar ndjeshëm e kjo është e rëndësishme. Sipas kreut të ekzekutivit britanik, ka shpresa se procesi mund të përshpejtohet por sërish, nga të dyja palët, do të nevojitet vullnet për kompromis.

Top Channel