Britani, Jeremy Corbyn, kryetari i ri i Laburistëve

Politikani veteran i krahut të majtë arriti thuajse 60 për qind të mbi 400 mijë votave, duke mposhtur rivalët Andy Burnham, Yvette Cooper dhe Liz Kendall.

Menjëherë pas fitores ai u përball me një eksod të anëtarëve të së ashtuquajturës qeveria hije, por figura të njohura si Ed Miliband u bënë thirrje anëtarëve të partisë që të shkojnë pas kryetarit të ri.

Corbyn konsiderohej një person i padëshiruar kur tre muaj më parë nisi gara elektorale, por arriti tek fitorja përmes një vale entuziazmi të shkaktuar nga mesazhet e tij kundër masave anti-krizë dhe premtimet për asgjësimin e arsenalit bërthamor britanik dhe rishtetëzimin e sistemeve hekurudhore.

Corbyn tha për BBC se, ndihej paksa i habitur nga shkalla e fitores së tij, por shtoi se fushata e tij tregoi se, “politikat mund të ndryshojnë dhe ne i kemi ndryshuar”.

Ai pritet të rizgjedhë tani anëtarët e kabinetit hije, pa pasur detyrime ndaj anëtarëve të deritanishëm që pas zgjedhjes së tij janë larguar.

Ai ka bërë gjithashtu me dije se synon të ndryshojë formatin e interpelancës ndaj kryeministrit në Parlament. Faktikisht, Corbyn pritet të përballet me Cameron të mërkurën e ardhshme.

Çështje të tjera për të cilat Corbyn ka tërhequr vëmendjen janë ato të politikës së jashtme, ku spikasin largimin e Britanisë së Madhe nga NATO dhe madje dënimin e ish-kryeministrit Tony Blair për krime lufte, lidhur me pjesëmarrjen e ushtrisë britanike në luftën në Irak.

Edhe qëndrimi i tij për Ukrainën ka bërë jeohnë, pasi ndryshe nga Perëndimi, kreu i laburistëve pretendon se ekspansionizmi rus është provokuar nga Brukseli dhe politikat e NATO-s po nxisin më tej krizën.

Top Channel