Të paktën 80 persona janë vrarë nga sulmet ajrore të forcave qeveritare në një treg në qytetin Douma, pranë Damaskut.
Lajmi është bërë i ditur nga aktivistët sirianë, që konfirmuan edhe plagosjen e rreth 200 personave të tjerë.
Gjatë muajve të fundit, forcat qeveritare kanë kryer sulme të vazhdueshme ajrore në këtë qytet, i cili kontrollohet nga rebelët. Me qindra civilë kanë mbetur të vdekur së bashku me shumë luftëtarë të opozitës siriane gjatë muajve të fundit në këtë rajon.
Imazhet e publikuara nga aktivistët tregojnë një treg të shkatërruar tërësisht, automjete në flakë, si dhe dëmtime të rënda kanë pësuar edhe ndërtesat përreth kësaj zone. Gjithashtu thuhet se grupet e shpëtimit janë duke gërmuar nën rrënoja në kërkim të personave të mbijetuar.
Një dëshmitar e ka përshkruar situatën për agjencinë e lajmeve “Associated Press” si katastrofike, duke shtuar se qendrat shëndetësore në zonë ishin të mbushura me të plagosur.
Top Channel
