Mbi 100.000 vetë kanë firmosur peticionin kundër mbylljes së një plazhi në rivierën franceze, çka do t’i lejonte mbretit saudit, Salman t’i kalonte atje pushimet pa praninë e njerëzve të tjerë.
Organizatorët e nismës këmbëngulin se plazhi publik “Vallauris” duhet te jetë i disponueshëm për të gjithë.
Autoritetet nisën mbylljen e tij mëngjesin e së shtunës për të parandaluar çdo pushtim të mundshëm të zonës nga protestuesit, teksa pritej mbërritja e monarkut saudit.
Mbreti Salman duhet të qëndrojë në vilën e tij për rreth tre javë. Ai shoqërohet nga një shpurë prej gati 1.000 personash, 700 nga të cilët do të qëndrojnë në hotelet e Kanës, çka konsiderohet me shumë leverdi për ekonominë lokale.
Megjithatë, mbyllja e pjesës së plazhit “La Mirandole” pranë vilës së mbretit ka ngjallur indinjatën e banorëve, që këmbëngulin se është e drejtë e të gjithëve, francezë të huaj, të shijojnë bukuritë e kësaj zone turistike.
Top Channel
