Nga pritja që iu bë Lulzim Bashës në Lazarat, dukej se politikisht atje nuk ka ndryshuar asgjë. Një vit pas ndërhyrjes antikanabis të policisë në Lazarat, Basha, u kujdes disa herë të veçonte banorët atje nga narkotrafikantët.
“Ne e kemi përkrahur dhe e përkrahim pa asnjë kusht luftën kundër bimëve narkotike. Ne kurrë nuk kemi qenë kundër luftës ndaj bimëve narkotike, përkundrazi, bashkë e kemi luftuar dhe kemi arritur suksese”, tha Basha.
Si sukses kreu i PD përmendi vendimin e 5 viteve më parë të Bashkimit Europian për liberalizimin e vizave, çka sipas tij, nuk do të mund të arrihej pa luftën antikanabis edhe në Lazarat. Ndërsa ndërhyrjen e vitit të kaluar, Basha e trajtoi si një aksion qeveritar për të marrë nën kontroll narkotrafikun.
“Por halli i dyshes Rama-Meta nuk ishte të hiqte hashashin, por halli ishte të merrte hashashin për vete, ta kultivonte dhe ta tregtonte. Ata që stigmatizojnë Lazaratin janë përgjegjës për rritjen e trafikut të lëndëve narkotike, për trafikun nga ajri si asnjëherë më parë të hashashit, kokainës dhe heroinës; janë ata që trafikantet nuk i luftojnë, por i kanë bërë deputetë të partive të tyre, i kanë bërë drejtorë, i kanë futur në polici. Kjo është dyfytyrësia e tyre”, u shpreh kreu i Partisë Demokratike.
Sipas Lulzim Bashës, dyfytyrësia është kthyer në standard të qeverisjes Rama-Meta.
“Marrin natën qytetarë dhe i çojnë në biruca, ndërkohë kapitenët e krimit shëtisin krah më krah me qeveritarët vendorë dhe qendrorë”, tha Basha.
Lideri i opozitës tha se vota për Partinë Demokratike dhe Igli Kokalarin është vendimi më i mençur i banorëve të Lazaratit.
“Të zotohemi edhe një herë për një Lazarat europian, që i bindet ligjit; për një Lazarat që punon me djersën e ballit; për një Lazarat që gëzon respektin e Gjirokastrës e të gjithë Shqipërisë”, u shpreh Basha.
Top Channel
