Dy të vdekur dhe 21 të plagosur është bilanci në një konflikt të dhunshëm të radhës në burgun famëkeq të Koridhalosë në Greqi, mbrëmjen e së dielës.
Sipas informacioneve ekskluzive që ka siguruar Top Channel, incidentet kanë ndodhur në ndarjen e tretë të këtij institucionit penitenciar, ku vuajnë dënimet mbi 500 persona, kryesisht për trafikim droge.
Sulmet e përgjakshme midis të burgosurve janë zhvilluar pas orës 20:00 të mbrëmjes së të dielës, kur një grup të dënuarish shqiptarë dhe arabë kanë sulmuar disa të burgosur nga Pakistani me mjete të forta, si thika artizanale dhe leva.
I pyetur nga korrespodenti i Top Channel në Greqi, Aleksandër Marku, kreu i Sindikatës së Përgjithshme të rojeve të burgjeve në të gjithë vendit, Spiros Karakitsos, ka deklaruar se dy personat që humbën jetën janë të burgosur nga Pakistani.
Sa u përket të plagosurve të tjerë, sipas tij, ende nuk ka një informacion të qartë për identitetin e tyre, por thuhet se dy të burgosur janë në gjendje të rëndë, nga 21 persona që u transportuan me 10 ambulanca nga spitali i burgut drejt spitaleve Gjenimatas dhe Tzanios, në kryeqytet.
Incidentet e dhunshme shpërthyen, ndërsa të burgosurit po hynin në qelitë e tyre. Ende nuk dihen arsyet e kësaj përplasjeje.
Situata për momentin është e qetë, jashtë burgut forca të shumta policore janë në gatishmëri, ndërsa është hapur një hetim i gjerë rreth këtij konfrontimi.
“Ishte diçka që pritej”, është shprehur kreu i Sindikatës së Gardianëve, Spiros Karakitsos, i cili ka kujtuar se në vitin e fundit ka bërë disa paralajmërime për viktima në burgje, nëse qeveritë përkatëse nuk merrnin masa urgjente për mbipopullimin e institucioneve penitenciare, kushteve tepër të papërshtatshme në to dhe ligjeve që kanë të bëjnë me dënimet e paraburgimit, si dhe një shpërndarjeje më të rregullt të të burgosurve me kombësi të ndryshme.
Top Channel
