Gjermania, e gatshme të pranojë daljen e Greqisë nga eurozona

Qeveria gjermane thuhet se është e përgatitur të pranojë largimin e Greqisë nga eurozona, nëse kjo do të ishte e nevojshme. Në publikimin e së shtunës të kësaj reviste, bëhet e ditur se Kancelarja Merkel dhe ministri i Financave Wolfgang Schauble besojnë se një zhvillim i tillë nuk do të ishte i papërballueshëm për pjesën tjetër të eurozonës.

Raporti citonte progresin e bërë në eurozonë që prej vitit 2012, kur kriza e borxheve të eurozonës thuhet të ketë kapur majën më të lartë, duke hedhur poshtë kështu frikën se një ndodhi si “grexit” (dalje e Greqisë nga eurozona) do të shkaktonte disintegrim në unionin e monedhës europiane.

“Rreziku i efektit domino është i kufizuar, sepse Portugalia dhe Irlanda janë rehabilituar në mënyrë të konsiderueshme”, është cituar të ketë thënë një burim qeveritar nga “Der Spiegel”. Madje, Mekanizmi i Qëndrueshmërisë Europiane (ESM), apo fondi për shpëtimin e eurozonës, shihet tashmë si një mekanizëm efektiv dhe i mundshëm për shpëtim. Bankat kryesore do të ishin të mbrojtura nga unioni bankar.

E megjithatë, një kthesë e këtillë në politikën e jashtme gjermane pritet të konfirmohet nga qeveria, pasi Berlini në të kaluarën ka qenë i vendosur të mbajë Greqinë në bllokun europian. Aksionet europiane dhe obligacione të caktuara të eurozonës kanë rënë ndjeshëm gjatë javës së kaluar, pasi Parlamenti grek refuzoi kandidatin e kryeministrit Antonis Samaras për President. Kjo e çoi vendin drejt zgjedhjeve të parakohshme, të cilat me shumë mundësi priten të fitohen nga partia opozitare “Syriza”, sipas sondazheve të fundit. Zgjedhjet do të mbahen më 25 janar.

Lideri i radikalëve të majtë, Alexis Tsipras, është angazhuar të përmbysë reformat e deritanishme të imponuara prej huadhënësve ndërkombëtarë të Greqisë, ku përfshihen Bashkimi Europian dhe Fondi Monetar Ndërkombëtar.

Top Channel