Kapen 34 sirianë e palestinezë

Policia Kufitare e Sarandës ka ndaluar një automjet tip Mercedes Benz brenda të cilit ndodheshin 3 persona, 2 shtetas shqiptarë dhe një shtetas i huaj i cili mendohet të jetë sirian, të cilët u shoqëruan në ambientet e Komisaritit të Policisë.

Menjëherë, në lidhje me këtë rast nga shërbimet e  Policisë Kufitare Sarandë në bashkëpunim me repartin Delta Force Vlorë janë organizuar shërbime të përbashkëta me qëllim parandalimin e një trafikimi të mundshëm të personave të tjerë të huaj.

Në vijimësi, nga shërbimet e përbashketa të policisë, rreth orës 20:40, në veri të fshatit Lukovë dhe pikërisht në vendin e quajtur ish-SMT, i është bërë shenjë të ndalojë një automjeti tip furgon mallrash i markës Fiat me targa FR 6650 C, drejtuesi i të cilit nuk i është bindur forcave të policisë, por ka manovruar duke u futur në një rrugë dytësore dhe menjëherë ka braktisur mjetin në ecje e sipër i cili, fatmirësisht, pasi ka bërë disa metra, është ndalur në anë të rrugës duke rrezikuar të rrëzohet nga disa dhjetëra metra lartësi.

Nga kontrolli i furgonit, brenda tij janë gjetur 34 persona, shtetas të huaj, të cilët mendohet se janë kryesisht sirianë dhe palestinezë, mes tyre 2 gra dhe 2 fëmijë.  Menjëherë nga shërbimet e policisë është dhënë ndihma e menjëhershme dhe është bërë nxjerrja e tyre pa u lënduar nga automjeti i cili rrezikonte të rrëzohej dhe shoqërimi për në komisariat.

Nga verifikimet e kryera ka rezultuar se targat e automjetit tip furgon janë të falsifikuara. Mendohet që klandestinët kanë hyrë nga kufiri i gjelbër me Greqinë dhe se do të trafikoheshin në drejtim të kufirit me Malin e Zi.

Top Channel