Ebola në SHBA, 100 teksanë në “sitë”

Në listë përfshihen të gjitha “kontaktet e mundshme” me Thomas Eric Duncan, një shtetas liberian i cili u diagnostikua me këtë virus në Dallas gjatë së martës, por pritet që numri i kësaj liste të bjerë.

Katër prej të afërmve të tij janë urdhëruar të qëndrojnë në shtëpi, teksa po kontrollohen për shenja të mundshme të kësaj sëmundjeje. Duncan, i cili besohet ta ketë marrë virusin në Liberi, është në gjendje kritike për jetën në spital.

Ai ishte rasti i parë i diagnostikuar me Ebola në tokën e Shteteve të Bashkuara. Ndërsa në Afrikën Perëndimore, më shumë se 3338 persona kanë vdekur, në atë që mund të konsiderohet si virusi më i përhapur vdekjeprurës në botë.

Rastet e konfirmuara me këtë sëmundje janë 7178, e vendet më të prekura janë Sierra Leone, Liberia dhe Guinea. “Save the Children” ka paralajmëruar se Ebola po përhapet me një “shpejtësi të jashtëzakonshme”, ndërsa rastet e reja po dyfishohen çdo javë.

Edhe Sekretari i Jashtëm britanik, Philip Hammond, ka bërë thirrje për vendimmarrje urgjente, përfshi më shumë ndihma financiare, doktorë e infermiere nga komuniteti ndërkombëtar, gjatë një konference në Londër.

Top Channel