ISIS “shtrëngon fort” Kobanin. Predha në Turqi

Disa qindra protestues të paarmatosur, të cilët ishin mbledhur në anën e kufirit turk në solidaritet me kurdët sirianë, kanë mundur të hedhin poshtë një gardh me tela e janë drejtuar për në brendësi të Kobanit, në përpjekje për të ndihmuar në mbrojtjen e qytetit.

Shteti Islamik nisi sulmet ndaj Kobanit më shumë se 1 javë më parë duke e pushtuar atë nga 3 anë, ndërkohë që më shumë se 140 mijë kurdë janë larguar nga qyteti dhe fshatrat e rrethuar, që prej të premtes së kaluar, duke kaluar kufirin për në Turqi.

Sulmet ajrore të udhëhequra nga Shtetet e Bashkuara kanë shënjestruar luftëtarët e Shtetit Islamik ngado në Siri, por disa zyrtarë ushtarakë kurdë kanë thënë se ato e kanë bërë më të pasigurt situatën në Kobani, duke nxitur kryengritësit sunitë të shkojnë drejt kufirit me Turqinë.

Luftëtarë të ISIS duken se kanë marrë kontrollin e një kodre, rreth 10 km në Perëndim të Kobanit, nga ku grupi kryesor i armatosur i kurdëve “Peshmerga” kanë sulmuar ata në Sirinë veriore gjatë ditëve të fundit.

Observatori Sirian për të Drejtat e Njeriut, me seli në Britani, e që monitoron gjendjen e luftës në Siri, tha se luftëtarët e ISIS kanë marrë gjithashtu kontrollin e një fshati rreth 7 km në Lindje të Kobanit.

Ndërkaq, raportohet se të shtëna artilerie të rëndë dhe breshëritë e mitralozëve janë shtuar së tepërmi përgjatë kufirit, ndërkohë që dy predha kanë goditur një pjesë brenda kufirit turk, edhe pse momentalisht nuk ka raportime për viktima.

Top Channel