VV në qeverinë e re

Të paktën kështu shkruan  gazeta “Blic Portal” në Prishtinë sipas të cilës Vetëvendosje ka pranuar dialogun Prishtinë-Beograd sikurse vazhdimin e procesit të privatizimit.

Në këtë mënyrë subjekti i Albin Kurtit do të bëhet pjesë e qeverisë së ardhshme LDK-AAK- Nisma. Gazeta “Blic” shkruan se ka arritur ta shohë draftin e marrëveshjes së arritur ndërmjet LDK-së, AAK-së, Nismës dhe Lëvizjes Vetëvendosje. Kjo marrëveshje përbëhet prej disa pika kryesore. Në këtë draft-marrëveshje ka pajtim për vazhdimin e dialogut me Serbinë, por natyrisht mbi parime. Sipas draft-marrëveshjes kërkohet angazhim për një dialog kualitativ dhe parimor, të orientuar dhe të fokusuar në çështjet me interes për Kosovën, përfshirë normalizimin e marrëdhënieve me Serbinë, por edhe njohjen e pavarësisë së Kosovës nga pesë vendet e BE-së, të cilat nuk e kanë njohur deri më tani, si dhe perspektivën e pranimit të Kosovës si anëtare e Kombeve të Bashkuara.

Kur jemi te dialogu me Serbinë kërkohet po ashtu që ky dialog duhet të kornizohet dhe të aprovohen edhe nga institucioni më i lartë në vend, nga Kuvendi i Kosovës. Kjo draft-marrëveshje parasheh edhe zhvillimin e dialogut me pakicën serbe në Kosovë. Ideja e këtij dialogu është që të fillojë integrimi i plotë i tyre, nëpërmjet zhvillimit ekonomik dhe shoqëror.

Marrëveshja ndërmjet koalicionit dhe VV-së ka paraparë që për zbatimin e detyrimeve nga marrëveshjet ndërkombëtare, të cilat i ka marrë Kosova përfshirë edhe marrëveshjet që dalin si rezultat i dialogut, në harmoni me mundësitë që i lejon Kushtetuta dhe në përputhje me subjektivitetin e Republikës së Kosovës.

Në Vetëvendosje nuk i mohojnë këto informacione. Zëdhënësi Erzen Vraniqi nëpërmjet rrjetit social Facebook njofton se në draftin e marrëveshjes që po qarkullon në media ka pika për të cilat është arritur pajtim, sikurse që ka pika për të cilat Lëvizja nuk pajtohet, pa dhënë detaje të hollësishme.

“Marrëveshja e plotë apo jo, do të vendoset të dielën në takimin e liderëve”, përfundon zëdhënësi i Vetëvendosjes.

Top Channel