Kosovë, nis regjistrimi i deputetëve

Procesi ka nisur me deputetët e PDK-së, për të vazhduar të enjten me ata të LDK-së dhe AAK-së, ndërsa të premten do të regjistrohen deputetët e Vetëvendosjes dhe të komuniteteve pakicë.

Deri në orën 16:00, sipas sekretarisë së Kuvendit janë regjistruar 31 deputetë për PDK-në, ndërsa 6 të tjerë duhet të regjistrohen deri në seancën kosntituive.

“Sot është një detyrim formal i joni që të plotësojmë formularët dhe të kryjemë proçedurat administrative në mënyrë që në datën e konstituimit të jetë gjithçka gati. PDK është fituese e zgjedhjeve dhe rrjedhimisht i takon pozita e kryetarit të Kuvendit, sikurse i takon me Kushtetutë edhe mandati për të formuar qeverinë dhe institucionet e tjera përcjellëse”, deklaroi deputeti Zenun Pajaziti.

“Unë mendoj se e rëndësishme është qe ne kemi arritur të dalim si subjekti i parë politik në vend, me gjithësej 37 deputetë në Parlament dhe mendoj se kjo është një fitore e PDK-së dhe e Misionit të Ri. Se si do të jetë matematika e koalicioneve brenda Parlamentit, kjo mbetet të përcaktohet gjatë javëve në vazhdim”, tha deputetja tjetër Blerta Deliu.

Regjistrimin si deputet për herë të parë e ka bërë të mërkurën edhe zyrtari i Vetëvendosjes, Fisnik Ismajli, pasi siç tha ai, në ditën që i është caktuar partisë së tij do të jetë jashtë Kosovës.

Ismajli, i cili njihet për komunikimin e veçantë në rrjetet sociale, në dalje të Kuvendit u përball me përshëndetjen e parë zyrtare nga deputetë të PDK-së.

Pas regjistrimit të deputetëve, të shtunën, kryesia e legjislaturës së kaluar do të mblidhet dhe do të caktojë axhendën për seancën e parë të Kuvendit që do të mbahet më 17 korrik.

Ndërkohë, më herët gjatë ditës, deputeti i PDK-së Azem Syla, përmes një njoftimi për mediay, ka bërë të ditur se për arsye personale nuk do të jetë më deputet. Në vend të tij vjen Nait Hasani.

Top Channel