Martin Schulz rizgjidhet në krye të PE-së

Schulz, pjesë e së majtës europiane u zgjodh në këtë pozicion si pjesë e një marrëveshjeje mes të majtëve dhe të djathtëve për ndarjen e posteve në BE. Sipas kësaj marrëveshjeje, Schulz qendron në postin e drejtuesit të Parlamentit Europian, ndërsa të majtët do të mbështesin kandidaturën e Jean-Claude Juncker në krye të Komisionit Europian.

Pjesë e marrëveshjes është edhe emri i Ministres së Jashtme italiane, Ema Bonino, e cila pritet të pasojë Catherine Ashton në postin e Përfaqësues së Lartë të BE-së për Politikë të Jashtme dhe Siguri.

Schulz do të drejtojë Parlamentin Europian për gjysmën e kohës së mandatit 5-vjeçar, për t’u pasuar më pas nga një kandidaturë e Partive Popullore Europiane. Në tetë vitet e fundit, ky post i PE-së është rregulluar gjithmonë me anë të një marrëveshjeje të tillë mes të majtëve dhe të djathtëve në PE.

Schulz është eurodeputeti i parë, që zgjidhet për një mandat të dytë, në krye të Parlamentit Europian.

Top Channel