Kievi: Mund të anulojmë armëpushimin

Burime ushtarake ukrainase kanë deklaruar se të paktën një ushtar ka mbetur i vrarë në afërsi të Slovianskut, basiton i rebelëve, dhe se zyra të shumta qeveritare janë sulmuar gjatë natës.

Presidenti Poroshenko zgjati armëpushimin njëjavor deri të hënën, me shpresën për progres në implementimin e planit të tij të paqes. Por duket se tani Kievi po humb durimin.

“Armëpushimi në lindje mund të tërhiqet para kohe në zonat ku nuk është respektuar”, ka deklaruar zëdhënësi i Këshillit të Sigurisë dhe Mbrojtjes, Andrei Lisenko.

Në pamje të parë, edhe fraksionet e rebelëve pro-rusë në lindje të vendit duket se janë të ndarë, me disa prej të cilëve e mbështesin armëpushimin dhe të tjerë e refuzojnë.

Një zëdhënës ushtarak ukrainas konfirmoi vrasjen e një ushtari në rrethinat e Slovianskut, ndërsa raportime mediatike flasin për tre të vdekur.

Zgjatja e armëpushimit nga presidenti Poroshenko erdhi disa orë pasi ai nënshkroi marrëveshjen e tregtisë me BE-në, që është dhe zanafilla e krizave të fundit që kanë përfshirë vendin.

Ndërkohë, duke folur të shtunën për televizionin shtetëror rus, ministri i Jashtëm Sergey Lavrov tha se, kriza ukrainase do të zgjidhej më lehtë nëse Shtetet e Bashkuara nuk do të përfshiheshin në të.

“Kolegët tanë amerikanë preferojnë ta shtyjnë Ukrainën në shtegun e përballjes”, tha ai. Ndërkohë, kancelarja Angela Merkel paralajmëroi qeverinë ruse se, sanksionet e Perëndimit mund të radikalizohen.

Top Channel