Thaçi, optimist për vendimin e gjykatës

Pasi ka përgëzuar të gjitha institucionet përgjegjëse për organizimin e zgjedhjeve, që u cilësuan më të mirat që nga paslufta, Thaçi ka thënë se partia dhe koalicioni që ai drejton do të mandatohen për formimin e qeverisë së re.

“Është arritur standardi më i lartë evropian. Tani natyrisht presim çertifikimin e rezultatit zgjedhor dhe përgjigjet e Gjykatës Kushtetuese në pyetjet e parashtruara nga presidentja e Kosovës, zonja Jahjaga, dhe pastaj partia fituese dhe koalicioni do të fillojnë konkretisht të punojnë për formimin e qeverisë së re të Republikës së Kosovës”,  ka deklaruar Thaçi.

Të mërkurën gjatë ditës, Thaçi ka pritur në takim një delegacion të Asamblesë Parlamentare të NATO-s, të kryesuar nga presidenti Hugh Bayley, ku kanë diskutuar për rrugën euro-atlantike të Kosovës.

Pas takimit, qeveria ka njoftuar përmes një komunikate se kryeministri Thaçi ka folur me delegacionin e NATO-s për punën që do të bëhet pas konstituimit të Kuvendit lidhur me formimin e Forcave të Armatosura të Kosovës.

Në këtë takim, kryesuesi i nën-komisionit për Mbrojtjen Transatlantike dhe Bashkëpunim për Siguri, Sverre Myrli, që përfaqëson Norvegjinë në Asamblenë Parlamentare të NATO-s, ka thënë se bashkësia ndërkombëtare duhet ta trajtojë Kosovën si shtet të pavarur dhe sovran.

Top Channel