Spanjë, arrestohen 8 persona, lidhje me ISIS

Të dyshuarit, sipas autoriteteve vendase, po përpiqeshin të dërgonin njerëz për të luftuar në krah të ndjekësve të të ashtuquajturit Shteti Islamik në Irak dhe Levant.

Operacionet policore u zhvilluan në Madrid, orët e para të mëngjesit të sotëm. Nga sa pohohet në deklaratën e autoriteteve spanjolle, lideri i celulës i identifikuar si Lahcen Ikasrrien është mbajtur për disa vjet në Guantanamo Bay të Kubës, pas arrestimit në Afganistan, por është liruar në 2005-n për mungesë provash.

Raporte të pakonfirmuara në median spanjolle tregojnë se njëri prej 8 të ndaluarve ishte nga Spanja, një tjetër nga Argjentina dhe 6 vinin nga Maroku.

Këto muajt e fundit, forcat vendase të sigurisë kanë ndërmarrë një seri aksionesh kundër militantëve dhe, me dyshimin e rekrutimit të luftëtarëve për grupet islamike në Libi dhe Mali, disa persona u arrestuan gjatë muajit Maj në enklavën e Melilla-s.

Ndërsa këtë fundjavë, një shtetas francez u ndalua nga policia gjermane, me dyshimin se luftonte për militantët në Siri. Ai u ndalua sapo mbërriti në Berlin, me avion nga Stambolli.

Nga ana tjetër, policia belge, që po heton vrasjen e katër personave në muzeun hebraik të Brukselit, është duke kërkuar nga Franca ekstradimin e një militanti, i cili kishte kaluar një vit me ekstremistët në Siri.

Top Channel