Lazarati në mediat ndërkombëtare

“Policia shqiptare mësyn fshatin e marijuanës”. Ky është titulli që gazeta amerikane “Washington Post” i ka vënë editorialit të saj kushtuar operacionit të Policisë së Shtetit të nisur në orët e para të së hënës.

“WP” shkruan se që prej orëve të para të së hënës, forca të shumta policore kanë rrethuar fshatin e njohur për kultivimin e lëndëve narkotike, por kanë hasur rezistencë gjatë përpjekjeve për të hyrë në brendësi të tij.

“Qindra policë të mbështetur nga automjete të blinduara mësynë fshatin në jug të Shqipërisë të hënën, por u pritën me plumba, predha, granada e madje edhe mortaja”, shkruan WP.

Më pas gazeta prestigjoze amerikane citon deklaratën e policisë se nuk ka patur asnjë të lënduar nga të shtënat me armë zjarri.

Në artikull citohet edhe deklarata e Ministrit të Brendshëm, Saimir Tahiri që u kërkoi banorëve të Lazaratit të distancohen nga elementët kriminalë.

Aksioni në Lazarat në mediat italiane
Gazetat dhe agjencitë: Fshati i marijuanës i rebelohet policisë

“Fshati i marijuanës i rebelohet policisë”. Me tituj si ky gazetat dhe agjencitë italiane të lajmeve përmbledhin të rejat e fundit që vijnë nga Lazarati.

Gazetat kryesore si “Corriere della Sera” apo agjencia “ANSA” nuk kursejnë detajet dhe pasqyrojnë me imtësi fazat e operacionit të policisë dhe reagimet e një pjese të popullatës.

Ndërsa “ANSA” shkruan për “luftë kundër policisë në fshatin e drogës”, duke i cilësuar si “skena beteje”, Rai News ndalet në detajet dhe vendosmërinë e ndërhyrjes së forcave të rendit, si dhe në të dhënat e prodhimit të marijuanës në Lazarat, fshat që është bërë i njohur për publikun italian pas shkrimeve në gazeta e reportazheve të gazetarëve të televizioneve private e publike.

Rai citon shifrat e Guardia di Finanza, të cilat flasin për mbi 900 tonë marijuanë të prodhuar vitin e kaluar vetëm në këtë fshat, që jo rrallë cilësohet si “mbretëria e drogës”.

Autoritetet italiane llogarisin që vlera e saj të jetë rreth 4.5 miliardë euro, rreth një e treta e prodhimit të brendshëm bruto shqiptar. Operacioni ka zënë vend edhe në mediat kanadeze dhe të tjera media në Europë.

Top Channel