Konflikti për kreun e BE

Pyetja polemizuese se kush do të drejtojë Komisionin Europian me shumë gjasë do të jetë në diskutim, por jo zyrtarisht.

David Cameron do të përpiqet të krijojë aleanca për bllokimin e kandidaturës së Jean Claude Juncker, çka e vendos kryeministrin britanik përballë Angela Merkel, publikisht mbështetëse e caktimit të ish-shefit të qeverisë së Luksemburgut në krye të ekzekutivit të bllokut europian.

Krerët e Bashkimit Europian e kanë caktuar tradicionalisht vetë drejtuesin e komisionit, por rregullat e reja i detyrojnë të marrin në konsideratë rezultatet e zgjedhjeve parlamentare.

Partia Popullore Europiane, grupimi më i madh i qendrës së djathtë në PE, anëtar i së cilës është edhe Juncker, siguroi numrin më të madh të vendeve në zgjedhjet e majit.

Ai argumenton se një fakt i tillë duhet t’ia japë automatikisht mandatin. Por vëzhguesit vërejnë se as Juncker e as ndonjë kandidat tjetër nuk ka mundur deri tani të sigurojë një shumicë të qartë.

Disa nga liderët e bllokut, ndër të cilët edhe Cameron i shfaqur së fundi si zëri më i fuqishëm kundërshtues, këmbëngulin se prioritetet e komisionit duhet të ripërvijohen përpara zgjedhjes së një pretendenti të përshtatshem.

Ai i presidentit të Komisionit Europian është posti më i fuqishëm në Bruksel. Kësaj figure i takon detyra e formëzimit të politikave të BE-së në zona kyçe si reformat ekonomike, emigracioni apo lidhjet me fuqitë e tjera globale.

Shumë pak detaje ka nga minisamiti i Harpsundit. Megjithatë, në krye të axhendës thuhet të jetë krijimi i vendeve të reja të punës, ndryshimet kushtetuese në bllokun europian, si dhe reformat strukturore për rritjen e konkurrencës së tij.

Top Channel