SHBA, 5 të vdekur në Las Vegas

Trupat i mbuluan me një flamur, qëlluan për vdekje një civil e, pas kësaj, burrë e grua kryen vetëvrasje.

Të identifikuar vetëm si Jared dhe Amanda, të rinjtë tek të 20-at mësynë një piceri në veriperëndim të qytetit, e i vranë policët teksa hanin.

Alyn Beck, 42 vjeç, dhe kolegu i tij 32-vjeçar, Igor Soldo, u zunë krejtësisht të papërgatitur, edhe pse – sipas BBC-së, – njëri prej tyre arriti t’i përgjigjej zjarrit, por pa mundur të cënojë agresorët.

Fqinjët thonë se dy të rinjve iu ishin kthyer në mani teoritë e konspiracionit. Pasi qëlluan me plumb në kokë policët, që në ato momente nuk ishin as në detyrë, ata dolën nga piceria e iu drejtuan një supermarketi aty pranë, ku vranë në parkim edhe një kalimtar të rastit.

Në vijim, gruaja, sipas sherifit Doug Gillespie, qëlloi partnerin, e pastaj e ktheu armën nga vetja. Autoritetet thonë se nuk ka ende një motiv të qartë për episodin e shfaqur në mes të ditës, me shënjestër pjesëtarët e forcave të rendit.

Nuk dimë asgjë për agresorët, pohoi sherifi Gillespie, por po përpiqemi të mësojmë sa më shumë rreth tyre. Guvernatori Brian Sandoval u shpreh thellësisht i tronditur nga ngjarja dhe humbjet e jetëve, prej atij që e përshkroi si një “akt dhune krejtësisht të pakuptimtë”.

Top Channel